!!راقـــــــــب نفســــــك فـــــــى الخلـــــوات !!

[كن مع الله]

بسم الله الرحمن الرحيم
والحمد لله رب العلمين والصلاة والسلام على سيد الاولين والاخرين محمد وعلى اله وصحبة اجمعين وبعد ----
اخوانى \ اخواتى -- حياكم الله جميعا --
النهاردة يا اخواتى هنتكلم عن موضوع مهم جدا الموضوع ده هيكون ترمومتر لكل واحد فينا يقيس بيه درجة ايمانه بالله عز وجل --
الموضوع هيكون بعنوان - يا تـــــــرى ايه حال كل واحد فينا لما يكون قاعد لوحدة ؟؟

هل هيكون فى طاعة لله ؟؟ ام هيكون فى --------------؟؟
يمكن الكلام الى هقولة دلوقتى هيكون قاسى - بس ورب الكعبة انا هتكلم مع اخوانى واخواتى كلام القلب للقلب فانتا اخى وانتى اختى --

بصوا يا اخواتى انا هبد كلامى بحديث عن رسول الله صلى الله علية وسلم -- بس والله لتخلى بالك من كل كلمة فى الحديث الى هقوله دلوئتى -
قال النبى صلى الله علية وسلم --لاعلمن أقواماً من أمتي يأتون يوم القيامة بحسنات أمثال جبال تهامة ‏بيضاً، فيجعلها الله عز وجل هباء منثوراً". قال ثوبان: يا رسول الله صفهم لنا، جلهم ‏لنا، أن لا نكون منهم ونحن لا نعلم. قال: "أما إنهم إخوانكم ومن جلدتكم، ‏ويأخذون من الليل كما تأخذون، ولكنهم أقوام إذا خلوا بمحارم الله انتهكوها"
الله اكبر يعنى اية الكلام دة ؟
تعالوا كدة نشرح الحديث خطوة خطوة --
النبى صلى الله علية وسلم بيقول للصحابة انا اعرف ناس من امتى هيجوا يوم القيامة ومعاهم حسنات زى الجبال - حسنات كثيرة فربنا يجعلها هباء منثورا - يعنى تخيل كدة معايا القطن لما يكون فى رياح شديدة ويطير فى الهواء -- او شفت الريش لما يطير فى الهواء يكون شكله ازاى -؟ الحسنات بتاعت الناس دى ربنا هيجعلها كدة تطير كلها - كلها هتروح مفيش وجود ليها ولا قيمة ولا اثر الصحابة قالوا للنبى مين دول الى هيلاقوا يوم القيامة حسنات زى الجبال وتضيع منهم ؟؟ اوصفهم لينا يا رسول الله -- فراح النبى صلى الله علية وسلم قال دول مسلمين من الامة وياخذون من الليل ما تاخذون -- الله اكبر يعنى مبيصلوش الفروض وبس دة هما كمان بيقيموا الليل سلم يا ربى سلم -- ايه دة بيصلوا قيام ليل ويحصلهم كدة ؟؟ طيب ليه يا رسول الله --؟اقرا واقراى ولكنهم قوم اذا خلوا بمحارم الله انتهكوها -- هيا دى يعنى لو كان قاعد فى مكان لوحدة قفل الغرفة على نفسة قفل الباب وقفل الشباك وارخى الستائر وشغل الكمبيوتر ليبحث عن موقع اباحى -- او فيلم قبيح -- وراح شغل التلفزيون ومسك الريموت علشان يدور على اغنية هابطة ساقطة او فيديو كلب فاضح او يرى مسلسلا تافه - اهو هو قاعد لوحدة ومحدش من اهله شايفه ! لوحدة ومتاكد ان ابوه وامه واخواته نايمين ولو حد خبط على الباب فجاة او سمع صوت حد جاى برا الباب يروح بسرعة يطفى الكمبيوتر او يغطية ويطفى التلفزيون بسرعة ---يااااااااه اعوذ بالله ! خاف من البشر ونسى ان رب البشر من فوق سبع سموات ينظر اليه ! لو قاعد لوحده يروح يتصل بفلانة او يشيت مع فلانه او يشرب الخمر والسجاير والمخدرات وهو بكده يجعل محدش شايقه وبرضو نسى ان ربنا الى خلقة شايفه !
واحد تانى بالليل يروح يسرق ويقول توكلنا على الله ويدعو ربنا انه محدش يشوفة وهو الغبى خايف من الناس انهم يشفوه ومخايفش من ربنا وكمان يا جراته يدعى ربنا ويذكرة ولا حتى هو فى باله ربنا اى قلب واى عقل واى انسان دة !
يعنى كدة من الاخر لما يكون قاعد لوحده يعمل اى حاجة محرمة اى معصية بعيد عن الناس علشان محدش يشوفة هو يتكسف من الناس انهم يشفوة على المعصية دية يتكسف من امه او ابوه او اخواتة او حتى اصحابة ولكن ميتكسفشى من ربنا انه يشوفوة ! جعل الله اهون الناظرين اليه!
الانسان الى يعمل كده ويخاف انه حد من الناس تشوفه وهو يظن ويفتكر انه ربنا مش شايفه فما اعظم كفره بالله -- اما لو كان عارف ان ربنا شايفه ويعمل المعصيه - فما اقل حياؤه -- وما اقبحه وما اجراه على الله عز وجل يا انســــــــان الم تعلم بان الله يرى ؟؟
الله يسمعك - الله يراك -- الله مطلع عليك -- الله يراقبك -- استحى من ربك -- الله الذى يرى كل شى يرى الصغير قبل الكبير والقليل قبل الكثير
الله يرى ما تحت الارض وما فوق السماء
الله يرى ما تحت البحار وما فى باطن الارض
الله يرى النمله العمياء تحت الصخره الصماء فى الليل الظلماء
وما تسقط من ورقة الا يعلمها
ولا حبه فى ظلمات الارض ولا رطب ولا يابس الا فى كتاب مبين
يا اخواتى ربنا شايفنا والله العظيم شايفنا وسمعنا ويرانا
يا اخى والله العظيم ربنا شايفك -- يا اختى ورب الكعبة شايفك
ليه نتجرا على الله الملك ونعصيه -- ليه نخاف من الناس انهم يشفونا لما نعمل حاجة غلط ومنخفشى من ربنا -- والله احق ان تخشوه -- انتم عاوزين ينطبق علينا قول الله عز وجل ** يستخفون من الناس ولا يستخفون من الله وهو معهم ؟؟ يعنى يخافوا من الناس وميخفوشى من ربنا ! وربنا هو الى معاهم !
فين مراقبه الله ؟ دى راحت فين ؟ على فكرة يمكن احنا بنعمل ذنوب كتير اوى وربنا يسترنا مرة وراء مرة وراء مرة ولكـــــــــــــن خـــذ بـــــــالك -- الله يمهلك ولا يهملك !
ليه قبل ما نفكر نعمل اى حاجة غلط او اى حاجة مش كويسه ليه منحطش فى بالنا انه ربنا شايفنا ؟؟ لو احنا حطينا فى بالنا انه شايفنا ونروح برضو نعمل المعصية فى الخفاء علشان الناس
متشوفناش فما اقل حياؤنا من ربنا اما لو حطيت فى بالك انه الناس ولا ربنا هتشوفك يبقى ما اعظم كفرك بالله اة لانك انكرت صفة السمع والبصر لله فالله يسمع ويرى --
اوعى لما تكون لوحدك تفتكر انه محدش هيشوفك لالالالا
اسمع اسمع -- اذا ما خلوت الدهر يوما فلا تقل انى خلوت ولكن قل عليا رقيب ولا تحسبن الله يغفل ساعه ولا ان ما يخفى عليه يغيب
اوعى تقول محدش يشوفنى مرة ولد خد بنت وركبوا العربية وقال ليها تعالى هنروح فى مكان محدش هيعرفه غيرنا حتى ربنا نفسة مش هيشوفنا اعوذ بالله فراحت العربيه اتقلبت ومات الشخض دة فالبنت انهارات ومشيت وهى تقول بيقول مش هيشوفة راح قبض روحة--
يا انســــــــان !!
فوق ارضة وتعصية ؟؟
تحت سماءة وتعصية ؟؟
تاكل من رزقة ويرزقك وتعصية ؟؟
يسترك فى المعصية وتعصية ؟؟
ينجيك من المصائب والمشاكل وتعصية ؟؟
ينظر اليك من فوق سبع سموات وتعصية ؟؟
قلى من انت ؟ حتى تعصى الملك من انت ؟؟
يا ايها الانسن ما غرك بربك الكريم الذى خلقك فسواك فعدلك -
انتا مش خايف من ربنا وانتا بتعصى فية مش مكسوف وهو ينظر اليك انتا مش خايف لينظر ليك نظرة غضب ؟ والله العظيم لو نظر ليك الملك جل جلالة نظرة غضب والله هضيع والله كل حاجة فى حياتك هتنتهى -
انتا مش خايف من ربنا لما يعاتبك فى الاخرة ويقولك لية عملت كدة ؟
هتقدر تستحمل عتابة ؟ والله اتحداك مش هتقدر ! هتقدر على عتاب ربنا ليك ؟لما يقولك --
أما استحييت تعصينــــي ولا تخشى من العتـــــب
وتخفي الذنب عن خلقي وتأبى في الهوى قربـــــــي
فتب مما جنيت عســـــى تعــــود إلى رضــــى الرب
انتا تعرف والله العظيم كل حاجة عملتها كل شى قبيح عملته كله مكتوب عند ربنا دلوقتى ومحفوظ فى كتابك-- عارف كل كلمه قلتها تغضب ربنا اتكتبت -- كل كذبة كذبتها اتكتبت -- كل اغنية سمعتها اتكتبت -- كل نظرة محرمة اتكتبت -- كل شربة خمر وسجائر شربتها اتكتبت -- كل مال سرقتة اتكتب -- كل شتيمة شتمتها اتكتبت -- كل بنت ضحكت عليها وقتنتها باسم الحب اتكتبت
اقسم بربى كل شى كل شى اتكتب واتسجل فى كتابك كل ذرة شفت الذره والله هتلاقية يوم القيامة اقرا اقرا فمن يعمل مثقال ذره خير يره ومن يعمل مثقال ذره شر يره
يوم القيامة يا مسكين ربنا هيقولك اقرا كدة كتابك -- ووضع الكتب وترى المجرمين مشفقين مما فيه يقولون مال هذا الكتب لا يغادر صغيرة ولا كبيره الا احصاها ووجدوا ما عملوا حاضرا ولا يظلم ربك احد -- يوم القيامة المجرمين هيقولوا ايه دة الكتاب كل حاجة صغيرة او كبيرة اتسجل فيها ؟؟ فيلاقوا كل الى عملوة قدامهم يوم القيامة الذنب الى عمله فى الخفاء بعيد عن الناس يوم القيامة هيتفضح والكل هيعرف الاسرار هتبقى علانية اة مش يوم القيامة برضو يوم الفضيحة ؟
وتقرا كتابك يا مسكين وتقول يا ليتنى قدمت لحياتى - يا ريتنى اشتغلت للاخره لحياتى الحقيقة الى هخلد فيها
وتندم وتقول يا حسرتى على ما فرطت فى جنب الله
انتا يمكن عايش حياتك بالطول والعرض وعايش كدة وخلاص للدنيا ونسيت نفسك فوق بئا قبل ما تندم فوق فوق قبل ما تموت
انتا مستنى ايه ؟ انتا لغاية دلوقتى بتعصى فى ربنا ؟؟ هتوب امتى قولى ؟ هتوب لما ملك الموت يقبض روحك ؟ ولا مستنى تعيش كام سنة تانية ؟
يا غافلا عن العمل قد غرة طول الامل -- الموت ياتى بغته والقبر صندوق العمل
مستنى اية يا اخى ؟ وانتى مستنية اية يا اختى ؟؟
الحق نفسك وتوب بسرعة والله لو ما لحقت نفسك من دلوئتى هتندم يمكن تكون دى اخر رساله هتوصلك منى ممكن يكون كلامى اخر انذار ليك ايوة والله انا مش بهزر انا بتكلم جد
اندم بئا وتوب علشان كل الى تكتب فى كتابك من ذنوب ومعاصى ومصائب ربنا يبدله ليك حسنات
تعالوا كدة نشوف قصص من السلف ونوف ازاى كانت الناس التقية دى تخاف من ربنا
مرة من الايام كان عمر بن الخطاب ماشى فى الليل فسمع امراة عجوز بتقول لبنتها اخلطى اللبن بالماء فالبنت قالت يا جدتى عمر ابن الخطاب نهى انه حد يخلط اللبن بالماء ! فراحت العجوز قالت للبنت عمر مش موجود دلوقتى وعمر مش شايفنا واحنا بنخلط اللبن بالماء ! شوفوا البنت المؤمنة التقية النقية ردت على جدتها وقالت ايه !! قالت ليها يا جدتى لو كان عمر مش شايفنا فرب عمر شايفنا !!
يا الله اية الجمال والتقوى دى دول اتربوا فى المدرسة المحمدية !
طيب تاخدوا قصة تانية ؟؟
كان ابن سيدنا عمر ماشى فى صحراء فراح لقى راعى غنم فراح ابن عمر فكر انه يمتحن ايمان راعى الغنم فبن عمر قال للراعى بيع ليا وحدة من الغنم دول-- فراح راعى الغنم قال ليه انا عبد وسيدنى مامنى عليهم يعنى انا شغال عند واحد وهو مامنى عليهم مش هينفع ابيع ليك منهم حاجة واخد ثمنها كمان !!
فراح ابن عمر قال ليه وهو برضو بيمتحن فى ايمان راعى الغنم بس انتا بيعها لية وقول لسيدك الى شغال عندة قول ليه الذئب الى اكلها !!
فراعى الغنم الى قلبة ممتلى ايمان وخوف وتقوى ومراقبة لله قال لية لو قلت لسيدى ان الذئب الى اكلها فماذا اقول لله ؟ فماذا اقول لله ؟ فماذا اقول لله ؟؟
اقول اية لربنا الى شايفنى يوم القيامة اقوله اية ؟ اقوله اية لما تنطق عليا الجوارح والاركان لما تنطق ايدى ورجلى واذنى وعينى اقول ايه ؟ يااااااااااااااااااه كلام تقوى وخوف ايمان والله مش عارفة اقول اية انا لما اسمع القصص دى -- حد فينا بيوصل لدرجة الايمان ومراقبة الله والخوف من ؟ ايوة اكيد فى كثير ناس كدة فالخير باقى فى امة محمد صلى الله علية وسلم الى ان يرث الله الارض ومن عليها --
طيب اسمحولى ان اعطيكم قصص تانية ونشوف الناس الجميله دى كانت بتعمل اية --
قـدم شاب فجلس في حلقة الشيخ وتأخرت نفقته من الصعيد ففـارق حلقة الشيخ عساه يحصل كسيـرات من الخبز ولقيمات يقتات بها ويتقوى عليهـا.
فبينما هو يسيـر إذ دخل في شارع ضيق فوجد باباً مفتوحاً ووجـد خزانة من طعام فمد يده إلى الطعام وكان من المحشي ثـم بعد أن تناول قطعة منه ووضعها في فمـه.
تـذكر أنه جاء ليطلب العلم، والعلم نـور، والأكل من هذا الطعام دون أن يستحل صاحبه يظلـم القلب ولا يـمكن أن يجتمع النور والظلمة وسيطرد أحدهما الآخـر.
فتـرك هذا الطعام وعاد لحلقة شيخة وبـه من الجوع ما لا يعلمه إلا الله، وبعد أن انتهى الدرس إذا بامـرأة تأتي وتكلم الشيخ كلاماً لم يفهمه الحاضرون.
ثـم قال الشيخ لطالب العلم هـذا:
يـا عبدالله ألك رغبة في الزواج؟ فقال: أتـهزأ بي، والله من ثلاثة أيـام ما دخل جوفي طعام فيكف أتـزوج؟؟
قـال الشيخ: إن هذه المرأة تذكر أن زوجها تـوفي وترك بنتاً واحدة وكان ذا ثروة ومال كثيـر وتريد أن يتزوج ابنتها رجل صالح يعيـش معها ومع ابنتها وينمي المال ويرعـاه.
فقـال: إن كان كذلك فلا بأس فخرج الشيـخ والتلميذ والمرأة والحاضرون يسيـرون حتى دخلوا البيت الذي دخله هذا الشاب من قبـل فلما وضع الطعام بكى هذا الشـاب.
فقـال له الشيخ: لم تبكـي؟ هل أكرهناك على الـزواج؟
قـال: لا.
ولكـني قبل سويعات دخلت هذا البيـت لأكل من هذا الطعام الذي وضع بين أيدينا فتذكـرت أنه حرام فتركته لله فأعاده الله إلي ومعه غيـره عن طريق الحـلال.
يا الله ومن يتق الله يرزقة الله من حيث لا يحتسب
شفتوا اخواتى تذكر ان ربنا شايفة لما يروح ياكل الطعام فراح استرجع وشوف ربنا كافاة ازاى ؟
رجل اسمه نوح ابن مريم كان ذي نعمة ومال وثراء وجاه، وفوق ذلك صاحب دين وخلق، وكان له أبنة غاية في الجمال، ذات منصب وجمال. وفوق ذلك صاحبة دين وخلق.

وكان معه عبد اسمه مبارك، لا يملك من الدنياء قليلا ولا كثيرا ولكنه يملك الدين والخلق، ومن ملكهما فقد ملك كل شيء.
أرسلَه سيده إلى بساتين له، وقال له اذهب إلى تلك البساتين وأحفظ ثمرها وكن على خدمتها إلى أن آتيك.
مضى الرجل وبقي في البساتين لمدة شهرين.
وجاءه سيده، جاء ليستجم في بساتينه، ليستريح في تلك البساتين.
جلس تحت شجرة وقال يا مبارك، أتني بقطف من عنب.
جاءه بقطف فإذا هو حامض.
فقال اتني بقطف آخر إن هذا حامض.
فأتاه بآخر فإذا هو حامض.
قال أتني بآخر، فجأءه بالثالث فإذا هو حامض.


كاد أن يستولي عليه الغضب، وقال يا مبارك أطلب منك قطف عنب قد نضج، وتأتني بقطف لم ينضج.
ألا تعرف حلوه من حامضه ؟
قال والله ما أرسلتني لأكله وإنما أرسلتني لأحفظه وأقوم على خدمته.
والذي لا إله إلا هو ما ذقت منه عنبة واحدة.
والذي لا إله إلا هو ما راقبتك ، ولا راقبت أحدا من الكائنات، ولكني راقبت الذي لا يخفى عليه شيء في الأرض ولا في السماء.
أعجب به، وأعجب بورعه وقال الآن أستشيرك، والمؤمنون نصحة، والمنافقون غششة، والمستشار مؤتمن.
وقد تقدم لابنتي فلان وفلان من أصحاب الثراء والمال والجاه، فمن ترى أن أزوج هذه البنت ؟
فقال مبارك:
لقد كان أهل الجاهلية يزوجون للأصل والحسب والنسب.
واليهود يزوجون للمال.
والنصارى للجمال.
وعلى عهد رسول الله صلى الله عليه وسلم، يزوجون للدين والخلق.
وعلى عهدنا هذا للمال والجاه.
والمرء مع من أحب، ومن تشبه بقوم فهو منهم.
أي نصيحة وأي مشورة ؟
نظر وقدر وفكر وتملى فما وجد خيرا من مبارك، قال أنت حر لوجه الله (أعتقه أولا).
ثم قال لقد قلبت النظر فرأيت أنك خير من يتزوج بهذه البنت.
قال أعرض عليها.
فذهب وعرض على البنت وقال لها:
إني قلبت ونظرت وحصل كذا وكذا، ورأيت أن تتزوجي بمبارك.
قالت أترضاه لي ؟
قال نعم.
قالت فإني أرضاه مراقبة للذي لا يخفى عليه شيء في الأرض ولا في السماء.
فكان الزواج المبارك من مبارك.
فما الثمرة وما النتيجة ؟
حملت هذه المرأة وولدت طفلا أسمياه عبد الله، لعل الكل يعرف هذا الرجل.
..........


إنه عبد الله ابن المبارك يعتبر احد موؤسسي علم الحديث الذي ما من إنسان قلب صفحة من كتب التاريخ إلا ووجده حيا بسيرته وذكره الطيب.
إن ذلك ثمرة مراقبة الله غز وجل في كل شي.
أما والله لو راقبنا الله حق المراقبة لصلحة الحال، واستقامت الأمور.


اخواتى عاوزة اقول حاجة تانية
احيانا بيكون فى ناس ملتزمة كتير ومحترمة اهى بتصلى وتصوم وتقرا قراءن وبتقيم الليل قدام الناس ولكن اول ما تكون قاعدة لوحديها تروح تعمل الذنوب والمحرمات يعملها فى الخفاء علشان محدش من الناس يشوفها ونسى الله
يعنى لو شفت مثلا حد كان ملتزم جداااا ومشهور بالتزامة قدام الناس وفجاة حاله اتغير وانتكس ومعاصية ظهرت فالى حصله دة مش صدفة ومش فجاة لالالا
دة هو بارز ربنا فى الخلوات بالمعاصى يعنى فى الخفاء لغاية ما بقيت ذنوبة كثيرة فراحت ذنوبة دى ظهرت فى العلن فيروح الشخص دة ينتكس ولا حول ولا قوة الا بالله
يا اخواتى تذكـــــــــــــروا ان الله يراكم واستحيوا منه ان يراكم على معصية
قيل لرجل اسمة حاتم الاصم كيف حققت التوكل ؟؟
فمن ضمن الحجات الى قالها -- قال وعلمت ان الله مطلع على فاستحييت منه ان يرانى على معصية !!
يا اخواتى لازم نفكر قبل ما نعمل ذنب ان ربنا بينظر لينا ان ربنا شايفنا من فوق سبع سموات يا اخواتى
اذا خلوت يوما بريبة والنفس داعية للعصيان
فقل لها استحى من نظر الاله فان الذى خلق الظلام يرانى
احنا يا اخواتى نسينا حديث النبى صلى الله علية وسلم وهو بيعرف الاحسان
وقال -- الاحسان - ان تعبد الله كانك تراة فان لم تكن تراه فانه يراك
يا اخواتى نتوب بئا ونستحى انه ربنا يشوفنا على معصية تانى من النهاردة وناخد بالنا كويس
ونتوب لله على تجرانا علية ومعصيتة
واكتفى اخواتى بهذا القدر
وصلى اللهم على محمد وعلى اله وصحبة اجمعين
اررررررجو منكم الدعاء لى
والسلام عليكم ورحمة الله وبركاتة

[فارسة السنة]

شكرا اخي الفاضل
كلام في قمه الروعه
فعلا اخي الايمان يظهر في مراقبه النفس في الخلوات
جزاك الله كل الخير والله هذا مايحصل مع شبابنا هذه الايام
نسال الله ان يجعلنا ممن يخشوه ويخافوه في الخلوات ياارب
اللهم اهدينا وثبتنا على دينك ياارب
اللهم اهدي شبابنا وشباب المسلميين
اسمع هذا اخي الفاضل


http://www.youtube.com/watch?v=XcBee5l1uR8